एजेन्सी । सात गोलको रोमाञ्चक खेलमा बार्सिलोना आफ्नै घरेलु मैदानमा रियल बेटिससँग स्तब्ध बनेको छ ।

२० वर्षपछि क्याम्प नाउमा जीत निकाल्ने क्रममा बेटिस ४–३ गोलअन्तरले विजयी भएको हो ।

जुनियर फिर्पो र वाकिनको गोलको मद्दतले बेटिसले खेलको पहिलो हाफमा अप्रत्यासित अग्रता लिएको थियो ।

तर, चोटमुक्त भएर मैदानमा फर्किएका कप्तान मेस्सीले खेलको दोस्रो हाफमा पेनाल्टीबाट गोल गर्दै बार्सालाई खेलमा फर्काउने प्रयास गरे ।

यद्यपि, तीन मिनेटपछि नै जियोभानी लो सेलेसोले पुनः बेटिसको अग्रता दोब्बर बनाए

त्यसपछि एलेक्सीस भिडालले बार्साका लागि गोल गर्दै खेल ३–२ को स्थितिमा पुर्याए ।

खेलको ८१ औँ मिनेटमा रातो कार्ड खाँदै इभान र्याकिटिचले मैदान छाड्न बाध्य भएपछि बार्सिलोना १० खेलाडीमा सिमित बन्यो ।

यसको फाइदा उठाउँदै सर्जियो कानालेसले बेटिसको अग्रता पुनः दोब्बर बनाए ।

मेस्सीले खेलको इन्जुरी समयमा अर्को गोल फर्काए पनि टोलीलाई हारबाट जोगाउन सकेनन् ।

रक्षापंक्तिमा बार्सिलोना पछिल्लो २० वर्षमा सबैभन्दा खराब फर्मबाट गुज्रिरहेको छ । बार्सिलोनाले ला लिगाको लगातार १० खेलमा कम्तिमा एक गोल खाएको छ ।

पछिल्लो पटक सन् १९९८ मा लुइस भान गालको नेतृत्वमा बार्सिलोनाले लगातार १२ खेलमा क्लिन सिट राख्न असफल भएको थियो ।

पराजयका बावजुद बार्सिलोना लिगको शीर्ष स्थानमा कायम रहेको छ ।