Spread the love
  • 3
  •  
  •  
  •  
  •  
  •  
    3
    Shares

काठमाडौं । नेपाली कांग्रेसले महासमिति बैठकले पारित गरेको पार्टीको विधानमाथि आएका सुझावअनुसार विधानलाई परिमार्जन गरेर अनुमोदन गर्ने तयारी गरेको छ । कांग्रेसले पार्टी केन्द्रीय कार्यालय सानेपामा आज बिहान ११ बजेका लागि केन्द्रीय समिति बैठक डाकेको छ । बैठकले विधान अनुमोदनसँगै २ माघमा म्याद सकिएको नेविसंघको वर्तमान कार्यसमितिको म्याद चौथोपटक थप गर्ने वा तदर्थ समिति बनाउने भन्नेमा समेत निर्णय लिइने बताइएको छ ।

कांग्रेस वरिष्ठ नेता रामचन्द्र पौडेलले महासमितिले पारित गरेको विधानलाई प्राप्त सुझावका आधारमा केही परिमार्जन गरेर केन्द्रीय समितिमा लगिने र त्यसपछि केन्द्रीय समितिले अनुमोदन गर्ने जानकारी दिए ।

‘महासमिति बैठकले पारित गरेको पार्टीको विधानमाथि प्राप्त सुझावका आधारमा केही परिमार्जन गरेपछि केन्द्रीय समितिमा पेस गरेर अनुमोदन गरिन्छ,’ वरिष्ठ नेता पौडेलले भने ।

उनले नेविसंघका बारेमा भने म्याद थप गर्ने कि नगर्ने भन्नेमा नेताहरूबीच छलफल जारी रहेको तर निष्कर्षमा नपुगिएको जानकारी दिए ।

केन्द्रीय समितिमा पेस गरिने एजेन्डाका बारेमा सहमतिका लागि भन्दै सभापति देउवा निवास बूढानीलकण्ठमा बुधबार साँझ शीर्ष नेता, पदाधिकारीसहित पूर्वपदाधिकारीको बैठक बसेको थियो ।