Spread the love
  • 1
  •  
  •  
  •  
  •  
  •  
    1
    Share

सप्तरी । सप्तरीको डाकनेश्वरी नगरपालिका–३ तरहीकी २५ वर्षीया ललितादेवी साहको रहस्यमय मृत्यु भएको छ ।

आँपको रूखमा झुण्डी मृत्यु भएको अवस्थामा शनिबार फेला परेपछि उनका माइती पक्षले हत्या गरी आत्महत्या देखाउन रूखमा झुण्ड्याइएको आरोप लगाएका छन् ।

घटनाको जानकारी पाएलगत्तै घटनास्थल पुग्नुभएका इलाका प्रहरी कार्यालय कल्याणपुरका प्रहरी निरीक्षक विष्णुप्रदीप बस्यालले पासो लागेर झुण्डिएको अवस्थामा फेला परेको ललिताको शवको घाँटीमा पासोको नीलडामबाहेक अन्य चोटपटक नदेखिएको तर परिवारका सदस्य फरार भएकाले शंकास्पद रहेको बताए ।

घटनापछि मृतकका श्रीमान् शंकर साह, देवर राजकुमार साह र ससुरा रामदेव साह फरार छन् । शव परीक्षणबाट धेरै कुरा स्पष्ट हुने र अनुसन्धानमा सहयोग पुग्ने बताएका प्रहरी निरीक्षक बस्यालले घटनाको सूक्ष्म अनुसन्धान भइरहेको बताए । मृतककी बहिनी बन्दना साहले श्रीमानसहित घरपरिवारका सदस्यहरूले नै हत्या गरेर झुण्ड्याएको आरोप लगाइन् । शव र घटनास्थलको अवस्था हेर्ने जो कसैले हत्यापछि रूखमा झुण्ड्याएको भन्न सक्ने मृतकका दाजु विनोदकुमार साहको दाबी छ ।

यसअघि पनि ललितामाथि कुटपिट हुने गरेको कुरा उनी माइत आएका बेला सुनाउने गरेको विनोदले बताए । शव परीक्षणका लागि गजेन्द्रनारायण सिंह सगरमाथा अञ्चल अस्पताल ल्याइएको मृतक ललिताको नाक, मुखबाट रगत बगेको, आँखा, टाउको, छातीमा चोटपटक लागेको देखिएको भन्दै डा कल्पना साहले फोरेन्सिक जाँचका लागि धरानस्थित बिपी कोइराला स्वास्थ्य विज्ञान प्रतिष्ठानमा रेफर गरिएको छ । शवलाई शवपरीक्षणका लागि आइतबार साँझ धरानस्थित प्रतिष्ठान लगिएको छ ।

शंकरका मामा सोही ठाउँका इन्द्रदेव साहले घटनास्थल पुगेको प्रहरी सहितको टोलीले आत्महत्या नै भएको भने पनि माइती पक्षले हत्या गरेको भनेर आरोप लगाउन थालेपछि मृतकका श्रीमान् डरले फरार भएको बताए । सामाजिक परम्पराअनुसार १४ वर्षअघि विवाहित ललिताका दुई छोरा छन् ।